წინამდებარე სარჩელის წარმოებაში მიღების საფუძვლები არ არსებობს, ვინაიდან სახეზე არ გვაქვს საკონსტიტუციო სამართალწარმოების შესახებ საქართველოს კანონის მე-18 მუხლით გათვალისწინებული შემთხვევები, კერძოდ: 

ა)საჩელი სრულად აკმაყოფილებს  საკონსტიტუციო სამართალწარმოების შესახებ საქართველოს კანონის მე-16 მუხლის მოთხოვნებს;

ბ)სარჩელი შეთანილია უფლებამოსილი იურიდიული პირის მიერ, რომლის კონსტიტუციის 38-ე მუხლით აღიარებული უფლებებიც დაირღვა სადავო ნორმატიული აქტით და რომელიც წარმოადგენს „საქართველოს საკონსტიტუციო სასამართლოს შესახებ„ საქართველოს ორგანული კანონის 39-ე მუხლის პირველი ნაწილის სუბიექტს;

გ) სარჩელში მითითებული სადავო ნორმატიული აქტები წარმოადგენს საკონსტიტუციო სასამართლოს განსჯად საკითხებს, ვინაიდან გასაჩივრებულია კანონის ნორმები, რომლებიც არ შეესაბამება საქართველოს კონსტიტუციის 38-ე მუხლს;

დ) სარჩელში მითითებულ სადავო საკითხზე არ უმსჯელია საკონსტიტუციო სასამართლოს, შესაბამისად ამ საქმეზე მიღებული არ გახლავთ გადაწყვეტილება;

ე) სარჩელში მითითებული სადავო საკითხი არ არის მოწესრიგებული საქართველოს კონსტიტუციით;

ვ) დაცულია კანონოთ დადგენილი საჩივრის წარდგენის ვადა;

ზ) გასაჩივრებული გვაქვს საქართველოს კანონის (კოდექსი) კონკრეტული ნორმა, რომელსაც იერარქიულად ზემდგომი ნორმატიული აქტი არ გააჩნია გარდა საქართველოს კონსტიტუციისა, შესაბამისად სადავო საკითხზე მსჯელობა შესაძლებელია სხვა ნორმატიული აქტების კონსტიტუციურობაზე მსჯელობის გარეშე.

ყოველივე ზემოთ აღნიშნულიდან გამომდინარე, არ არსებობს საკონსტიტუციო სარჩელის წარმოებაში არ მიღების საფუძველი და გთხოვთ წინამდებარე სარჩელი მიიღოთ წარმოებაში.  

საქართველოს საგადასახადო კოდექსის 182-ე მუხლის პირველი ნაწილის „ე“ პუნქტის შესაბამისად „აქციზის გადამხდელია პირი, რომელიც ახორციელებს მობილური საკომუნიკაციო მომსახურების გაწევას“. ანუ აქციზის გადასახადით იბეგრებიან მობილური საკომუნიკაციო მომსახურეობის განმახორციელებელი ოპერატორები. თვალსაჩინოებისათვის ესენი გახლავთ შპს „მაგთიკომი“, შპს „ჯეოსელი“ და შპს „ბილაინი“. აღნიშნული კომპანიები გარდა მობილური ხმოვანი კავშირისა, ახორციელებენ ა) ფაქსის და მონაცემთა გადაცემის მომსახურეობას (FAX/DATA); ბ) მობილური ინტერნეტის მომსახურეობას (WAP); გ) მოკლე ტექსტური შეტყობინებით მომსახურებას (SMS) და სხვა მომსახურეობებს, რომელი მომსახურეობისთვისაც ისინი, მსგავსად ხმოვანი კავშირისა  იბეგრებიან აქციზის გადასახადით.

ზემოთ ჩამოთვლილ მომსახურეობებს, გარდა შპს „მაგთიკომის“ და სხვა მობილური ოპერატორებისა, ასევე ახორციელებენ ფიქსირებული ქსელის ოპერატორები. თვალსაჩინოებისათვის ესენი გახლავან: შპს „სილქნეტი,“ შპს „ახალი ქსელები“, შპს „ახტელი“ და სხვა ოპერატორები.