სარჩელი აკმაყოფილებს  ,,საკონსტიტუციო სამართალწარმოების შესახებ“ საქართველოს კანონის მე-18 მუხლის ,,ა“-,,ზ“ ქვეპუნქტებით დადგენილ  მოთხოვნებს:

1. სარჩელი ფორმალურად გამართულია და შეიცავს  კანონით სავალდებულო ყველა რეკვიზიტს;

2. შემოტანილია უფლებამოსილი პირების მიერ კონსტიტუციის მე-2 თავით გათვალისწინებული უფლებების დარღვევის გამო ;

3. სარჩელში  მითითებული  სადავო საკითხი  საკონსტიტუციო სასამართლოს განსჯადია;

4. სადავო საკითხთან დაკავშირებით არ არსებობს   საკონსტიტუციო სასამართლოს სხვა გადაწყვეტილება;

5. სარჩელი შემოტანილია კანონით დადგენილი ვადების დაცვით;

6. არ არსებობს სადავო აქტზე მაღლა მდგომი სხვა კანონი, რომლის კონსტიტუციურობასთან დაკავშირებით მსჯელობა იქნებოდა საჭირო  სადავო აქტის კონსტიტუციურობაზე სრულფასოვანი მსჯელობის უზრუნველყოფის მიზნით.

ზ/ა  გამომდინარე, არ არსებობს მისი სასამართლოში არსებითად განსახილველად არმიღების საფუძვლები. 

სადაო ნორმა არალეგიტიმურია და  არათანაბარ პირობებში აყენებს საარჩევნო სუბიექტებს, რადგან უფასო დროით სარგებლობის შესაძლებლობა აქვთ მხოლოდ  ზოგიერთ კვალიფიციურ საარჩევნო სუბიექტებს და არა არჩევნებში მონაწილე ყველა პარტიას (ნორმით ილახება კონსტიტუციის მე-14 მუხლი).

ნორმის კონსტიტუციასთან შესაბამისობაში მოყვანისათვის აუცილებელია მისი ფორმულირება იმგვარად, რომ  გამოყოფილი დრო თანაბრად იქნას  განაწილებული განურჩევლად ყველა საარჩევნო სუბიექტზე.  აქვე უნდა ითქვას, რომ ნორმა ლახავს მაუწყებლებების საკუთრების უფლებასაც (ნორმა წინააღმდეგობაში მოდის საქართველოს კონსტიტუციის 21-ე მუხლის მე-2 პუნქტსა და მე-3 პუნქტის 1-ლ წინადადებასთან). ნორმა ლეგიტიმური იქნებოდა იმ შემთხვევაში, თუ წინასაარჩევნო პერიოდში საკუთრების უფლების შეზღუდვა  -  უფასო საარჩევნო რეკლამის განთავსების ვალდებულება სახელმწიფოს მხრიდან  უზრუნველყოფილი იქნებოდა წინასწარი და სამართლიანი ანაზღაურების გზით. 

არსებული სადაო  ნორმის პირობებში, მსგავსი ვალდებულების დაწესება შეიძლება მოვითხოვოთ მაგალითისათვის კავშირგაბმულობის კომპანიებსა და ნავთობკომპანიებზე  და საარჩევნო პერიოდში მათ დავაკისროთ ვალდებულება, რომ გარკვეული თანხის ფარგლებში საარჩევნო სუბიექტებზე უსასყიდლოდ გასცენ საწვავის ტალონი ან/და ბარათები მობილური ტელეფონებისთვის.