მოსარჩელემ 1989-1993 წლებში მოსარჩელემ შემნახველ ბანკში შეიტანა 142823 საბჭოთა მანეთი. აღნიშნული თანხა 1994 წლის 13 მაისს შემნახველი ბანკის მოლარე კონტროლიორის მიერ მოსარჩელის ანაბრიდან პაიში იქნა გადატანილი 142823 საბჭოთა მანეთი. ამის მიზეზი გახდა ის, რომ საქართველოს რესპუბლიკის სახელმწიფო კომერციული შემნახველი ბანკი გარდაიქმნა საპაიო კომერციულ შემნახველ ბანკად, ხოლო მეანაბრეები მეპაიეებად. მეპაიედ შესვლის წესდების შესაბამისად (1994 წლის აპრილი), მოსარჩელეს უნდა მიეღო პაიში გადატანილი თანხის შესაბამისი დივიდენდი. ერთ პაიში გადატანილი იქნა მოსარჩელის სამანეთო ანაბარზე 1991 წელს დარიცხული კომპენსაცია, რამაც პაიში თანხის გადატანის მომენტისათვის შეადგინა 26245.

,,ვი-თი-ბი ბანკ ჯორჯიამ" უარი განუცხადა მოსარჩელეს კუთვნილი დივიდენდის მისაღებად. სადავო ნორმის საფუძველზე ეს თანხა გადატანილი იქნა კუპონებში, რომლის კურსი იყო 1:1-ზე რუსულ რუბლთან მიმართებაში. ამის გამო, განმცხადებელს უარი უთხრეს მისი კუთვნილი თანხის გაცემაზე.

ნორმატიული აქტის გამომცემი ორგანო - საქართველოს რესპუბლიკის მინისტრთა კაბინეტი დღეს აღარ არსებობს. ამის მიუხედავად, მის უფლებამონაცვლედ უნდა ჩაითვალოს საქართველოს მთავრობა. ,,საკონსტიტუციო სასამართლოს შესახებ" საქართველოს ორგანული კანონის 33-ე მუხლის მე-2 პუნქტის თანახმად: ,,თუ კონსტიტუციური სარჩელი ეხება საქართველოს კონსტიტუციის ამოქმედებამდე მიღებულ/გამოცემულ ნორმატიულ აქტს, მოპასუხეა ამ აქტის მიმღების/გამომცემის უფლებამონაცვლე ორგანო." საქართველოს კონსტიტუციის 78-ე მუხლის პირველი პუნქტის თანახმად, ,,საქართველოს მთავრობა არის აღმასრულებელი ხელისუფლების უმაღლესი ორგანო, რომელიც ახორციელებს ქვეყნის საშინაო და საგარეო პოლიტიკას." ამავე მუხლის მეორე პუნქტის თანახმად, ,,მთავრობა შედგება პრემიერ-მინისტრისა და მინისტრებისაგან. მთავრობის შემადგენლობაში შეიძლება იყოს ერთი ან რამდენიმე სახელმწიფო მინისტრი."

,,საქართველოს რესპუბლიკის მინისტრთა კაბინეტის სტრუქტურის შესახებ" საქართველოს პარლამენტის 1993 წლის 7 სექტემბრის დადგენილების თანახმად, საქართველოს მინისტრთა კაბინეტის სტრუქტურა შედგება: საქართველოს პრემიერ-მინისტრის, მისი მოადგილეების, დარგობრივი სამინისტროებისა და კომიტეტებისაგან.