კოლეგიის შემადგენლობა:

1. ბესარიონ ზოიძე (თავმჯდომარე);

2. ვახტანგ გვარამია(მომხსენებელი მოსამართლე);

3. იაკობ ფუტკარაძე;

4. ნიკოლოზ შაშკინი.

სხდომის მდივანი: დარეჯან ჩალიგავა.

საქმის დასახელება: საქართველოს მოქალაქეები პაატა ქობულაძე და ალექსი მარიამიძე საქართველოს პარლამენტის წინააღმდეგ.

დავის საგანი: კონსტიტუციურია თუ არა საქართველოს კონსტიტუციის 42-ე მუხლის პირველ და მე-2 პუნქტებთან და მე-14 მუხლთან მიმართებით „საქართველოს საერთო სასამართლოების მოსამართლეთა დისციპლინური პასუხისმგებლობისა და დისციპლინური სამართალწარმოების შესახებ“ საქართველოს 2000 წლის 23 თებერვლის კანონის 74¹ მუხლის პირველი პუნქტი, 74³ და 74⁴ მუხლები, 74⁶ მუხლის პირველი პუნქტის „ა“ და „ბ“ ქვეპუნქტები.

საქმის განხილვის მონაწილენი:

მოსარჩელეები - პაატა ქობულაძე და ალექსი მარიამიძე, მოსარჩელე ალექსი მარიამიძის წარმომადგენელი – მანანა კობახიძე, ქეთევან მეხუზლა, თეიმურაზ ქორიძე და ვანდა ჯიჯელავა; მოპასუხის –საქართველოს პარლამენტის წარმომადგენლები მარინე რობაქიძე და იოსებ ლომაშვილი.

საქართველოს საკონსტიტუციო სასამართლოში 2005 წლის 19 და 20 მაისს, შესაბამისად, შემოვიდა საქართველოს მოქალაქეების – პაატა ქობულაძისა და ალექსი მარიამიძის 330-ე და 331-ე ნომრებით რეგისტრირებული კონსტიტუციური სარჩელები. ამავე წლის 25 მაისს ისინი გადმოეცა საკონსტიტუციო სასამართლოს პირველ კოლეგიას არსებითი განხილვისათვის მიღებისა და მათი გაერთიანების საკითხების გადაწყვეტის მიზნით. სასამართლო კოლეგიის ღია განმწესრიგებელი სხდომა გაიმართა 2005 წლის 7 ივნისს.

სარჩელების შემოტანის საფუძველია საქართველოს კონსტიტუციის 89-ე მუხლის პირველი პუნქტის „ვ“ ქვეპუნქტი, „საქართველოს საკონსტიტუციო სასამართლოს შესახებ“ საქართველოს ორგანული კანონის მე-19 მუხლის პირველი პუნქტის „ე“ ქვეპუნქტი და 39-ე მუხლის პირველი პუნქტის „ა“ ქვეპუნქტი, „საკონსტიტუციო სამართალწარმოების შესახებ“ კანონის მე–10 მუხლის პირველი პუნქტი და მე-16 მუხლის პირველი და მე-2 პუნქტები.

მოსარჩელეები, რომლებიც დისციპლინური გადაცდომის გამო განთავისუფლდნენ მოსამართლის თანამდებობიდან, კონსტიტუციურ სარჩელში მიუთითებენ, რომ „საქართველოს საერთო სასამართლოების მოსამართლეთა დისციპლინური პასუხისმგებლობისა და დისციპლინური სამართალწარმოების შესახებ“ კანონის 74¹ მუხლის პირველი პუნქტით, 74³ და 74⁴ მუხლებითა და 74⁶ მუხლის პირველი პუნქტის „ა“ და „ბ“ ქვეპუნქტებით ირღვევა მათი კონსტიტუციური უფლებები. სადავო ნორმების არაკონსტიტუციურად ცნობის მიზნით მოსარჩელეები მოითხოვენ კონსტიტუციური სარჩელის არსებითად განსახილველად მიღებას.

განმწესრიგებელ სხდომაზე მოსარჩელეებმა დააზუსტეს კონსტიტუციურ სარჩელში მითითებული მოთხოვნები და დავის საგნად მიიჩნიეს „საქართველოს საერთო სასამართლოების მოსამართლეთა დისციპლინური პასუხისმგებლობისა და დისციპლინური სამართალწარმოების შესახებ“ კანონის 74¹ მუხლის პირველი პუნქტის, 74³ მუხლისა და 74⁶ მუხლის პირველი პუნქტის „ა“ და „ბ“ ქვეპუნქტების კონსტიტუციურობის საკითხი საქართველოს კონსტიტუციის 42-ე მუხლის პირველ და მე-2 პუნქტებთან მიმართებით.

მოპასუხე მხარის – საქართველოს პარლამენტის წარმომადგენელთა აზრით, კონსტიტუციური სარჩელები არ უნდა იქნეს მიღებული არსებითად განსახილველად.

სასამართლო კოლეგია აღნიშნავს, რომ მოსარჩელეებმა ვერ დაასაბუთეს „საქართველოს საერთო სასამართლოების მოსამართლეთა დისციპლინური პასუხისმგებლობისა და დისციპლინური სამართალწარმოების შესახებ“ კანონის 74⁶ მუხლის პირველი პუნქტის „ა“ და „ბ“ ქვეპუნქტების არსებითად განსახილველად მიღების, მათი არსებითად განხილვის აუცილებლობა. ამასთან ერთად, მოსარჩელეებმა ყურადღება ძირითადად გაამახვილეს სადავო ნორმების კონსტიტუციურობის შემოწმებაზე კონსტიტუციის 42-ე მუხლის პირველ პუნქტთან მიმართებით. მათ ვერ დაასაბუთეს სადავოდ დასახელებული ნორმების მიმართება საქართველოს კონსტიტუციის 42-ე მუხლის მე-2 პუნქტთან. თანაც, სასამართლო კოლეგია მიუთითებს, რომ შესაბამის საკითხთან დაკავშირებით საკონსტიტუციო სასამართლომ უკვე იმსჯელა და მიიღო სათანადო გადაწყვეტილება (№1/3/209,276).

ამგვარად, სასამართლო კოლეგია მიიჩნევს, რომ მოქალაქე პაატა ქობულაძის 330-ე ნომრით რეგისტრირებული და მოქალაქე ალექსი მარიამიძის 331-ე ნომრით რეგისტრირებული კონსტიტუციური სარჩელები დაზუსტებული სახით ნაწილობრივ მისაღებია არსებითად განსახილველად. კერძოდ არსებითად განხილული უნდა იქნეს „საქართველოს საერთო სასამართლოების მოსამართლეთა დისციპლინური პასუხისმგებლობისა და დისციპლინური სამართალწარმოების შესახებ“ საქართველოს 2000 წლის 23 თებერვლის კანონის 74¹ მუხლის პირველი პუნქტისა და 74³ მუხლის კონსტიტუციურობა საქართველოს კონსტიტუციის 42-ე მუხლის პირველ პუნქტთან მიმართებით. კონსტიტუციური სარჩელები ამ ნაწილებში ძირითადად შეესაბამებიან „საკონსტიტუციო სამართალწარმოების შესახებ“ კანონის მე-16 მუხლის პირველი და მე-2 პუნქტებით დადგენილ მოთხოვნებს, მოსარჩელეები საკონსტიტუციო სასამართლოსადმი მიმართვის სუბიექტები არიან და სადავო საკითხები საკონსტიტუციო სასამართლოს განსჯადია.

ამასთან, სასამართლო კოლეგია მიუთითებს, რომ 330-ე და 331-ე ნომრით რეგისტრირებულ კონსტიტუციურ სარჩელებში მოსარჩელეები საქართველოს მოქალაქეებია და დავის საგანიც ერთი და იგივეა. ამ გარემოებათა გათვალისწინებით, სასამართლო კოლეგიას შესაძლებლად მიაჩნია მათი ერთ საქმედ გაერთიანება და ერთობლივად განხილვა.

ზემოაღნიშნულ გარემოებათა გათვალისწინებით, იხელმძღვანელა რა საქართველოს კონსტიტუციის 89-ე მუხლის პირველი პუნქტის „ვ“ ქვეპუნქტით, „საქართველოს საკონსტიტუციო სასამართლოს შესახებ“ ორგანული კანონის მე-19 მუხლის პირველი პუნქტის „ე“ ქვეპუნქტით, 21-ე მუხლის მე–2 პუნქტით, 39-ე მუხლის პირველი პუნქტის „ა“ ქვეპუნქტითა და მე-2 პუნქტით, 43-ე მუხლის მე-2, მე-5, მე-7 და მე-8 პუნქტებით, „საკონსტიტუციო სამართალწარმოების შესახებ“ კანონის მე-16 მუხლის პირველი და მე-2 პუნქტებით, მე-17 მუხლის მე-5 პუნქტით, 21-ე მუხლის პირველი პუნქტითა და 22-ე მუხლით, საქართველოს საკონსტიტუციო სასამართლოს რეგლამენტის 30-ე და 31-ე მუხლებით და 33-ე მუხლის პირველი პუნქტით,

საქართველოს საკონსტიტუციო სასამართლო
ა დ გ ე ნ ს

1. მიღებულ იქნეს საკონსტიტუციო სასამართლოში არსებითად განსახილველად საქართველოს მოქალაქეების - პაატა ქობულაძის და ალექსი მარიამიძის 330-ე და 331-ე ნომრებით რეგისტრირებული კონსტიტუციური სარჩელები საქართველოს პარლამენტის წინააღმდეგ იმის თაობაზე, რომ კონსტიტუციურია თუ არა „საქართველოს საერთო სასამართლოების მოსამართლეთა დისციპლინური პასუხისმგებლობისა და დისციპლინური სამართალწარმოების შესახებ“ საქართველოს 2000 წლის 23 თებერვლის კანონის 74¹ მუხლის პირველი პუნქტი და 74³ მუხლი, საქართველოს კონსტიტუციის 42-ე მუხლის პირველ პუნქტთან მიმართებით.

2. 330-ე და 331-ე ნომრებით რეგისტრირებული კონსტიტუციური სარჩელები გაერთიანდეს ერთობლივად განხილვის მიზნით ერთ საქმედ – „საქართველოს მოქალაქეები – პაატა ქობულაძე და ალექსი მარიამიძე საქართველოს პარლამენტის წინააღმდეგ“

3. საქმეს არსებითად განიხილავს საქართველოს საკონსტიტუციო სასამართლოს პირველი კოლეგია;

3. საქმის არსებითად განხილვა დაიწყება „საქართველოს საკონსტიტუციო სასამართლოს შესახებ“ ორგანული კანონის 22-ე მუხლის პირველი პუნქტის შესაბამისად;

2. საოქმო ჩანაწერი საბოლოოა და გასაჩივრებას ან გადასინჯვას არ ექვემდებარება.

კოლეგიის წევრები:

ბ.ზოიძე

ვ. გვარამია(მომხსენებელი მოსამართლე);

ი. ფუტკარაძე;

ნ. შაშკინი.