სარჩელი აკმაყოფილებს  ,,საკონსტიტუციო სამართალწარმოების შესახებ“ საქართველოს კანონის მე-18 მუხლის ,,ა“-,,ზ“ ქვეპუნქტებით დადგენილ  მოთხოვნებს:

1. სარჩელი ფორმალურად გამართულია და შეიცავს  კანონით სავალდებულო ყველა რეკვიზიტს;

2. შემოტანილია უფლებამოსილი პირის მიერ კონსტიტუციის მე-2 თავით გათვალისწინებული უფლებების დარღვევის გამო - ქ. თბილისის საქალაქო სასამართლოს განაჩენით სსკ-ს 314-ე მუხლის 1-ლი და მე-2 პუნქტებით (ჯაშუშობა) გათვალისწინებული ქმედების ჩადენის გამო მომესაჯა თავისუფლების აღკვეთა 20 წლის ვადით (ქ. თბილისის საქალაქო სასამართლოს 2010 წლის 29 იანვრის განაჩენის, საქმე # 1/3883-09. საქმეს ადევს საიდუმლო გრიფი რის გამოც, განაჩენი სარჩელს თან არ ერთვის). ზ/ა განაჩენი ძალაში დატოვა, როგორც სააპელაციო, ისე საკასაციო სასამართლომ. უკანონო განაჩენის დადგომა და ჩემი კანონიერი უფლებების შელახვა სხვადასხვა ფაქტორებთან ერთად მნიშვნელოვანწილად განაპირობა თავად 314-ე მუხლის ბუნდოვანმა შინაარსმა.

3. სარჩელში  მითითებული  სადავო საკითხი  საკონსტიტუციო სასამართლოს განსჯადია;

4. სადავო საკითხთან დაკავშირებით არ არსებობს   საკონსტიტუციო სასამართლოს სხვა გადაწყვეტილება;

5. სარჩელი შემოტანილია კანონით დადგენილი ვადების დაცვით;

6. არ არსებობს სადავო აქტზე მაღლა მდგომი სხვა კანონი, რომლის კონსტიტუციურობასთან დაკავშირებით მსჯელობა იქნებოდა საჭირო  სადავო აქტის კონსტიტუციურობაზე სრულფასოვანი მსჯელობის უზრუნველყოფის მიზნით.

ზ/ა  გამომდინარე, არ არსებობს მისი სასამართლოში არსებითად განსახილველად არმიღების საფუძვლები. 

სადავო ნორმით არალეგიტიმურად იზღუდება კონსტიტუციური ნორმა. თუ დანაწესით კანონმდებელი მიზნად ისახავდა ჯაშუშობის დაკონკრეტებას, ამ ნორმამ ჯაშუშობა პირიქით ბუნდოვანი გახადა.

კონსტიტუციით საქართველოს ნებისმიერ მოქალაქეს აქვს უფლება თავისუფლად მიიღოს და გაავრცელოს ინფორმაცია, გამოთქვას და გაავრცელოს თავისი აზრი ზეპირად, წერილობით ან სხვაგვარი საშუალებით. ამ მუხლით კი ნებისმიერი ადამიანის საქმიანობა შეიძლება ჩაითვალოს ჯაშუშობად, რადგან ტერმინები „სხვა ინფორმაცია“ და „საქართველოს ინტერესების საზიანოდ“ გაუგებარი და ბუნდოვანია.  აუცილებელია დაკონკრეტდეს რა იგულისხმება „სხვა ინფორმაცია“-ში და აგრეთვე დაკონკრეტდეს რას ნიშნავს „საქართველოს ინტერესების საზიანოდ,“ რადგან „საქართველოს ინტერესი“  პოლიტიკურად შეფასებითია. ასევე, აუცილებელია განიმარტოს და დაკონკრეტდეს თუ რა ორგანიზაციებზეა საუბარი, რადგან „უცხოეთის ორგანიზაცია“ ძალიან ზოგადი ტერმინია და მოიცავს ნებისმიერ ორგანიზაციას რომელიც უცხოეთშია რეგისტრირებული.