პლენუმის შემადგენლობა:

გიორგი პაპუაშვილი - სხდომის თავმჯდომარე;

კონსტანტინე ვარძელაშვილი - წევრი, მომხსენებელი მოსამართლე;

ქეთევან ერემაძე - წევრი;

მაია კოპალეიშვილი - წევრი;

მერაბ ტურავა - წევრი;

ზაზა თავაძე - წევრი;

ოთარ სიჭინავა - წევრი;

ლალი ფაფიაშვილი - წევრი;

თამაზ ცაბუტაშვილი - წევრი.

სხდომის მდივანი: დარეჯან ჩალიგავა.

საქმის დასახელება: საქართველოს მოქალაქეები - გიორგი უგულავა, ნუგზარ კაიშაური, დავით წიფურია, გიზო ღლონტი, გიორგი ლობჟანიძე და არჩილ ალავიძე საქართველოს პარლამენტის წინააღმდეგ (კონსტიტუციური სარჩელები N740 და N764).

განსახილველი საკითხი: №740 და №764 კონსტიტუციურ სარჩელებზე საქართველოს საკონსტიტუციო სასამართლოს წევრის - ლალი ფაფიაშვილის შუამდგომლობა თვითგანრიდების შესახებ.

I

1. 2016 წლის 30 აგვისტოს საქართველოს საკონსტიტუციო სასამართლოს პლენუმს №740 და №764 კონსტიტუციურ სარჩელებზე საქართველოს საკონსტიტუციო სასამართლოს წევრმა ლალი ფაფიაშვილმა მიმართა თვითგანრიდების შუამდგომლობით, ზემოაღნიშნული კონსტიტუციური სარჩელების განხილვაში მონაწილეობიდან თვითგანრიდების საკითხთან დაკავშირებით.

2. შუამდგომლობაში აღნიშნულია, რომ ხსენებულ საქმეთა განხილვის პროცესში მოსარჩელე მხარემ დაუსაბუთებლად, თუმცა არაერთხელ განაცხადა მოსამართლეთა ნაწილის, მათ შორის ლალი ფაფიაშვილის მიკერძოებულობის შესახებ.

3. მოსამართლე ლალი ფაფიაშვილის მოსაზრებით, მოსარჩელეთა განცხადებებმა კამპანიური ხასიათი მიიღო, რის ნათელ გამოხატულებასაც წარმოადგენს ტელეკომპანია „რუსთავი-2“-ის ეთერში 2016 წლის 28 აგვისტოს გასული სიუჟეტი. მოსამართლის მტკიცებით, მიუხედავად იმისა, რომ მისი ოჯახის წევრის მიმართ სისხლისსამართლებრივი დევნა არასდროს გამოუყენებიათ და სიუჟეტში მითითებულ საქმეზე გამოძიება სწორედ ოჯახის წევრის განცხადების საფუძველზე მიმდინარეობდა და დასრულდა 2016 წლის იანვარში (მაშინ, როდესაც ამ სარჩელების ნაწილი საკონსტიტუციო სასამართლოში დარეგისტრირებულიც კი არ იყო), სიუჟეტი წარიმართა იმგვარად, რომ მაყურებელს მასში მოყვანილი გარემოებები მასზე სავარაუდო ზეწოლის საშუალებად აღექვა.

4. შუამდგომლობაში აღნიშნულია, რომ ასეთ პირობებში ლოგიკური იქნებოდა მოსარჩელეთა მიერ მოსამართლის აცილების საკითხის დაყენება, თუმცა ის ფაქტი, რომ ამგვარი შუამდგომლობა მათ არ დაუყენებიათ, კიდევ ერთხელ უსვამს ხაზს, რომ ისინი მოსარჩელე მხარის ცალკეული წარმომადგენლების პოლიტიკური მიზნის მისაღწევად ცდილობენ სასამართლოს დამოუკიდებლობის თემით მანიპულირებას.

5. შუამდგომლობის ავტორს მიაჩნია, რომ მისი თვითგანრიდება ემსახურება სასამართლოს მიერ გამოტანილი გადაწყვეტილების სანდოობისა და სასამართლოს ავტორიტეტის დაცვას.

II

1. „საქართველოს საკონსტიტუციო სასამართლოს შესახებ“ საქართველოს ორგანული კანონის 46-ე მუხლის პირველი პუნქტის “ა” ქვეპუნქტი მოსამართლის აცილების შესაძლებლობას უშვებს მხოლოდ იმ შემთხვევაბში, თუ „საკონსტიტუციო სასამართლოს წევრი პირდაპირ ან არაპირდაპირ დაინტერესებულია საქმის შედეგით, ან თუ არის სხვა გარემოება, რომელიც ეჭვს იწვევს საკონსტიტუციო სასამართლოს წევრის მიუკერძოებლობაში“. თავად მოსამართლის მიერ საქმიდან განრიდების შემთხვევას აწესრიგებს ამავე კანონის 46-ე მუხლის მე-2 პუნქტი, რომლის თანახმადაც, საკონსტიტუციო სასამართლოს წევრს უფლება აქვს, განერიდოს საქმის განხილვაში მონაწილეობას, თუკი არსებობს ხსენებული მუხლით გათვალისწინებული რომელიმე საფუძველი.

2. მოცემულ შემთხვევაში „საქართველოს საკონსტიტუციო სასამართლოს შესახებ“ საქართველოს ორგანული კანონის 46-ე მუხლის პირველი პუნქტის „ბ“ ქვეპუნქტის თანახმად, სასამართლომ უნდა შეამოწმოს, სახეზეა თუ არა გარემოებები, რომლებიც მიუთითებს, რომ ქალბატონი ლალი ფაფიაშვილი პირდაპირ ან არაპირდაპირ დაინტერესებულია საქმის შედეგით, ან თუ არის სხვა გარემოება, რომელიც ეჭვს იწვევს მის მიუკერძოებლობაში.

3. შუამდგომლობაში მითითებულია, რომ თვითგანრიდების მოთხოვნის საფუძველი გახდა კონკრეტული მოსარჩელეების მიერ მოსამართლის მიმართ მკვეთრად გამოხატული ნეგატიური დამოკიდებულება და ბრალდება მიკერძოებულობის შესახებ. ქალბატონი ლალი ფაფიაშვილი ერთ-ერთ საფუძვლად ასევე მიუთითებს საზოგადოების მიერ მის ობიექტურობაში შესაძლო დაეჭვებაზე. არგუმენტად მას მოჰყავს ტელეკომპანია „რუსთავი-2“-ის ეთერში 2016 წლის 28 აგვისტოს გასული სიუჟეტი.

4. საკონსტიტუციო სასამართლოს პლენუმი მიიჩნევს, რომ ამა თუ იმ საინფორმაციო წყაროს მეშვეობით მოსამართლის მიმართ გაჟღერებული ნეგატიური დამოკიდებულება თავისთავად ვერ გახდება მის მიუკერძოებლობაში ეჭვის შეტანის საფუძველი. მოსარჩელის მიერ ან მედიის საშუალებით დაუსაბუთებელი ბრალდებების გავრცელება ზოგადად ვერ გახდება მოსამართლის აცილების ან/და თვითგანრიდების საფუძველი. შესაბამისად, შუამდგომლობა არ უნდა დაკმაყოფილდეს.

III

„საქართველოს საკონსტიტუციო სასამართლოს შესახებ“ საქართველოს ორგანული კანონის 46-ე მუხლის მე-2 პუნქტის, „საკონსტიტუციო სამართალწარმოების შესახებ“ საქართველოს კანონის 25-ე მუხლის მე-3 და მე-4 პუნქტების საფუძველზე,

საქართველოს საკონსტიტუციო სასამართლო ადგენს:

1. არ დაკმაყოფილდეს საქართველოს საკონსტიტუციო სასამართლოს წევრის - ლალი ფაფიაშვილის შუამდგომლობა №740 და №764 კონსტიტუციურ სარჩელებზე საქმის განხილვისა და გადაწყვეტის პროცესიდან თვითგანრიდების შესახებ.

2. განჩინება საბოლოოა და გასაჩივრებას ან გადასინჯვას არ ექვემდებარება.

3.განჩინება 15 დღის ვადაში გამოქვეყნდეს საქართველოს საკონსტიტუციო სასამართლოს ვებგვერდზე, გაეგზავნოს მხარეებს და „საქართველოს საკანონმდებლო მაცნეს“.

პლენუმის წევრები:

გიორგი პაპუაშვილი

კონსტანტინე ვარძელაშვილი

ქეთევან ერემაძე

მაია კოპალეიშვილი

მერაბ ტურავა

ზაზა თავაძე

ოთარ სიჭინავა

ლალი ფაფიაშვილი

თამაზ ცაბუტაშვილი